《 致莎玛︰叙利亚家书 》一套好戏正无声无息地上映中！
*《 致莎玛︰叙利亚家书 》唔係虚构故事，佢係一套纪录片*
一个大学生本来拍片是为记录日常，但敍利亚由和平示威变成政权向人民开战，拍落嚟嘅片段见证政府血腥镇压市民，亦都成为一封「家书」，话俾未来嘅囡囡知，佢嘅父母辈点解要留喺属于自己嘅城市阿勒坡…
阿勒坡係敍利亚第一大城市，娃迪（导演）一开头都係拍摄住大学生发起嘅和平示威，之后越演越烈，有数十民平民双手被绑成为浮尸、人民组织反抗军、政府军向平民开炮、政府军炸平民医院….阿勒坡係必争之地，伤亡非常惨重。
电影入面一幕幕炮轰、医院入面满地伤者全部都係切切实实发生紧，有妈妈喺条街到抱住死去儿子嘅尸体哭喊…有两个小朋友抱住被炸中嘅弟弟到医院，但已经返魂乏术…但战争中一样会有生命嘅奇蹟发生，观众情绪一路随住每段片段起落，会悲伤、会感动、会流眼泪。无电影可以比呢部纪录片更真实呈现战争嘅可怕与无常。
娃迪同做医生嘅另一半选择留喺阿勒坡，仲生咗囡囡莎玛。娃迪喺片段度同囡囡道歉，抱歉将佢生于乱世，每日担惊受怕，身边更不时有同胞身亡，但希望囡囡理解父母奋战到底嘅原因。
有几段片段都好深刻、好心痛，其中一段係娃迪同朋友嘅仔仔倾计。
「如果你爸妈要离开阿勒坡，你会点？」
「我想留低。」
「你啲朋友依家点？」
「有一部分走咗喇，剩低嘅逐个逐个被炸死…」
小朋友讲吓讲吓就忍唔住喊了。
持续9年嘅敍利亚内战至今仍未平息，中俄两国去年否决联合国援助敍利亚。世界上仲有好多地方无时无刻都喺度同极权对抗，甚至比香港情况恶劣百倍。呢条路唔易行，但香港人并非孤单。
我无办法通过文字完全地表达呢套电影对我心灵嘅撼动，呢套係今年睇过最好睇嘅电影之一。希望大家可以入场支持，你得到嘅体会绝对超乎想像。
文：sowhatmovie
评论0