《 无定向丧心老友记 》故事还好不过对白字字珠玑
《 无定向丧心老友记 》係2019年阿根廷本土火红火热嘅作品。睇完戏先知佢係翻拍1976年阿根廷出战奥斯卡但係最后无入围「最佳外语片」嘅一部 cult 片《Yesterday’s Guys Used No Arsenic》（《 无定向丧心老友记 》命运相同），都係讲一个过气女星想卖走佢间古老大屋，继而影响到三位同屋老友嘅命运。今次故事四个主角嘅定位分别係「影后」、「影后」嘅「绿叶」老公同埋一手提携「影后」成名嘅「导演」、「编剧」，成部戏嘅对白都几乎同拍电影、电影行业有关，自认係戏迷嘅观众一定可以从中搵到唔少乐趣。
主角人设劲有心思
《 无定向丧心老友记 》一开场就精心为观众交代四个主角嘅定位，而且係同佢哋嘅职业有密切关係：「影后」被困于昔日成功嘅梦幻，「绿叶」则睇唔透自己只喺追求紧一场梦幻；「编剧」一直等候愿者上钓，「导演」则係一个会主动出击嘅猛人。唔怕分唔清四个主角边个打边个，性格非常鲜明，反而两个想呃「影后」卖走大屋嘅「奸角」唔够突出。「女奸角」只係因为出场时间多所以比较有存在感，「男奸角」直头係流流哋。有可能係想「奸角」望落上比较弱鸡，切合电影嘅主题：呢两个掠夺者奸极都只係鼠辈，唔好以为斗得过真正嘅「好戏之人」。
有定向抑或无定向
《 无定向丧心老友记 》呢个译名摆明係想食几年前《无定向丧心病狂》嘅气势。我觉得《 无定向丧心老友记 》唔算好癫，最多只係人设骑呢，搵唔到有《无定向丧心病狂》里面啲 twist 会吓到你弹起嘅疯狂。《无定向丧心老友记》嘲讽电影或者电影业界里面有诸多嘅 cliche，而成部电影其实都係一场 cliche，剧情「有定向」而非「无定向」，不过导演有善用场面调度去误导观众，有几幕我都俾画面唔自然嘅空间感呃到，以为会有啲咩惊吓嘅事情发生。
一切都係按照导演编剧嘅旨意行事
「影后」过晒气，一直困住自己喺昔日嘅黄金年代，而佢间古老大屋就係呢个黄金年代嘅象徵，华丽，但係已经远离现实，同时影射演艺圈封闭又封建嘅制度。《无定向丧心老友记》大概係想讲一场电影界嘅世代之争，新世代想踩住旧世代上位，却斗唔过机关算尽嘅旧世代「导演」同「编剧」。拍戏嘛，正路就梗係跟住「导演」同「编剧」嘅节奏，不过跟得太贴嘅话，只会沦落成为扯线公仔。「影后」昔日之所以咁成功，係因为佢有个人特色，又识得自己话事，「导演」同「编剧」都只係负责喺佢背后推佢上神台；今时今日「影后」俾新世代利用，一直爱锡（係爱定係责任定係一己私利？）「影后」嘅「导演」同「编剧」于是出手。鼠辈以为自己可以话事，唔觉唔觉竟然变咗做「导演」同「编剧」操控之下嘅「奸角」，而「奸角」喺大多数电影里面都係无好下场，一个圈套紧扣一个圈套，种种角色关係真係写得妙绝。
故事还好不过对白字字珠玑
人设同角色之间嘅角力关係几特别，但係剧情又唔係话好有新意，最尾真係变咗有好多刻意堆砌出嚟嘅 cliche；反而喺剧情之上，角色对白有劲多可以细味嘅地方，而且真心幽默，尤其係串爆演艺人士自我感觉良好同埋潜规则处处嘅金句真係好正，其中一句「只要无人见到，就唔会有丑闻」简直係一绝。《无定向丧心老友记》最后一场戏完全係 cliche 嘅极致，虽然又係为咗配合主题，但係我嫌太 cliche，加上有啲唔合理（不过南美国家嘅嘢呢真係好难讲），停喺前一场戏失惊无神 black out 就啱我口味多啲。
文：灵光
评论0